មេឃុំគណបក្សសម រង្ស៊ី និយាយថា ប្រាក់សូកប៉ាន់ជារបស់ថ្នាក់លើ
20-May-2016 | ដោយ មែន កំសត់
ភ្នំពេញ៖លោក ស៊ាង ចែត មេឃុំស្រក ស្រុកកំពង់សៀម ខេត្តកំពង់ចាម នៃគណបក្ស សម រង្ស៊ី បាននិយាយថា ប្រាក់សូកប៉ាន់ចំនួន៥០០ដុល្លារ គឺជារបស់ថ្នាក់លើដែលសម្រាប់ប្រគល់ឲ្យក្រុមគ្រួសារអ្នកនាង ខុម ចាន់តារ៉ាទី ហៅស្រីមុំ តែពុំទាន់បានប្រគល់ផងក៏មានបញ្ហាតែម្ដង។
លោក ស៊ាង ចែត បាននិយាយបែបនេះ កាលពីល្ងាចថ្ងៃទី១៨ ខែឧសភា ឆ្នាំ២០១៦ នៅពេលដែលអនុរក្សពន្ធនាគារព្រៃស បញ្ជូនរូបលោកមកសាលាដំបូងរាជធានីភ្នំពេញ ដើម្បីសាកសួរបន្ថែម។ ទោះបីយ៉ាងណា រហូតមកទល់ពេលនេះ លោកស្រី ថ្លាង ផាណែត ចៅក្រមស៊ើបសួរសាលាដំបូងរាជធានីភ្នំពេញ កំពុងបន្តនីតិវិធីសំណុំរឿងនេះ ។
លោកស៊ាងចែតនៅព្រលប់ ថ្ងៃទី២៧ខែមេសាឆ្នាំ២០១៦ត្រូវបានឃុំខ្លួនដាក់ពន្ធនាគារបណ្តោះអាសន្ន ក្រោមការចោទប្រកាន់ពីបទសូកប៉ាន់សាក្សីតាមមាត្រា៥៤៨នៃ ក្រមព្រហ្មទណ្ឌ ។ បទល្មើសសូកប៉ាន់សាក្សី កំណត់ការផ្តន្ទាទោសពី៥ឆ្នាំទៅ១០ឆ្នាំ ។
លោក ស៊ាង ចែត ត្រូវបានអញ្ជើញមកសាកសួរពីខេត្តកំពង់ចាម មកអង្គភាពប្រឆាំងអំពើពុករលួយ កាលពីថ្ងៃទី២៤ ខែមេសា ឆ្នាំ២០១៦ ។ រហូតដល់វេលាម៉ោង២០និង៥នាទី ថ្ងៃ២៤ ខែមេសា អង្គភាពប្រឆាំងអំពើពុករលួយ សម្រេចឃាត់ខ្លួនលោក ស៊ាង ចែត តែម្ដង ។
ក្រសួង យុត្តិធម៌ បានចេញសេចក្ដីប្រកាសព័ត៌មានមួយ ដោយបញ្ជាក់ថា លោក ស៊ាង ចែត បាន បញ្ចុះបញ្ចូល លួងលោម ឲ្យ អ្នកនាង ខុម ចាន់តារ៉ាទី និយាយកុហកពីការពិត ប្រាប់មហាជន សារព័ត៌មាន និងសមត្ថកិច្ច អំពីរឿងទំនាក់ទំនងស៊ីជម្រៅជាមួយ លោក កឹម សុខា ហើយសន្យាថា នឹងជួយឱ្យបានទៅរស់នៅក្រៅប្រទេស៕
ចំនួនអ្នកទស្សនា
- ថ្ងៃនេះ1111
- ម្សិលមិញ2931
- សប្តាហ៍នេះ13301
- ខែនេះ1111
- ឆ្នាំនេះ984331
- សរុប20211777